نافذة مصر
روحى وإنتى مراتى
ومفيش وقت اكتب طلباتى
إحنا نشرف ع المأذون
بعدين ندخل فى المضمون
انا عاقل يا بنت الناس
لكن فيه حاجات ومواقف
بتخلينى اقلب مجنون
رقص التصويت فى الانتخابات مستحملهوش
تنجذبى لواحد قلبوه نوال انا ما بطيقهوش
اطبخى انواع الاكل وعلى كيفك
لكن الكفتة اشوفك عملاها يبقى يا ويلك
لو شفتى العرررض على التلفزيون
اقفلى على طول
مش ناقصة مصاريف وضرايب ورسوم
وناخدها متورجل على الاشغال علشان مصر
ونبطل نتكلم فى المحمول
وده طبعا صعب ومش معقول
نزول التحرير م الليلة اصبح ممنوع
احسنله يسموه ميدان التحريش
ويخلوله فـ كل محافظة فروع
علشان المساطيل والجرابيع واقعة من الجوع
انا مش هخرج عن موضوع وادخل موضوع

انتى مراتى تبقى حلالى
وكلامى لو بتحبينى هيكون مسموع
الفيسبوك وتويتر واليوتيوب
فيه سفالة وهرى ورغى وياما
حسنات بتضيع
لكن هشتاج انتخبوا العرررض
ده مفيش مانع ندخله ونصيع
واهى حاجة الواحد يتنفس وينفس فيها عشان موجوع
انا مش هخرج عن موضوع وادخل موضوع

الست العاقلة اللى بتسمع وتقول حاضر وبصوت مسموع
وتسيب جوزها يفك ويهدى بعدها تتناقش فى الموضوع
وده مش معناه صوتها هيعلى بالعكس هتفضل تتناقش وتقول رأيها بهدوء وخشوع
انا مش هخرج عن موضوع وادخل موضوع

الست اللى تربى عيالها علشان يطلعوا ظباط
لازم يطلعوا الفة وشاطرين
مش خمسين فى المية وفاشلين
بعدين لازم يتربوا ان هدفهم امن وخدمة كل الناس .. مايهمش مين
مش خدمة ريس وحكومته وكل نظامه ويقتلوا فى ولاد الناس المحترمين
يعتقلوم عاطل مع باطل ليه
ويهينوا ويضربوا ويذموا
ويربطوا فيهم ويغموا ده بتهمة ايه
رافضين الظلم والإستبداد
عايزين العدل بيجروا عليه
رافضين يقضوا حياتهم اسرى
مساجين للسمع وللطاعة
ويلبوا للظالم طلبه بخضوع ودموع
انا مش هخرج عن موضوع ادخل موضوع
كترت مواضيعى وحواراتى
مـ الاخر كده وبدون تطويل
روحى وانتى مراتى