طارق حسام الدين

قال لى :
الناس كلها عايشة حياتها عادى جدا ..
بناكل ونشرب ..
بنلعب ونخرج ..
الناس ماشية فى الشارع فى حالها ..
ناس بتتجوز ..
وناس بتخلف ..
والدنيا زى الفل ..

أى نعم الكهربا بتقطع شوية ..
والدعم اترفع عن البنزين والتموين ..
والأسعار غليت ..
والمرتبات نقصت شوية ..
والحكومة شادة حيلها عالناس فى الشارع ..

بس كل ده ..
على قلبنا زى العسل ! ..
أهم حاجة السيسى يقدر يقوم بالبلد ..

انتم اللى معيشين نفسكم فى جحيم بالأوهام بتاعتكم دى ! ..

قلت له :
ومين قال لك إننا عايشين فى جحيم ؟! ..
احنا عايشين حياتنا عادى جدا ..
بناكل ونشرب ونخرج ..
بنتجوز ونخلف ..
بننزل مظاهرات ومسيرات ..
والدنيا ماشية عادى جدا ..

أى نعم مهددين فى أى لحظة بالاعتقال ..
أوقات كتير مش بننام فى بيوتنا ..
أوقات كتير بنبقى مطاردين وهاربين ..
بننزل من بيوتنا ومش عارفين هنرجع ولا ﻷ ..
كتير من أصدقائنا وأهلنا فى السجون ..
كتير من أصدقائنا وأهلنا نحسبهم شهداء ..
ما زلنا بنزف كل يوم والتانى شهيد جديد ..

بس كل ده ..
على قلبنا زى العسل ..
أيوى ..
على قلبنا زى العسل ..

احنا مش عايشين فى أوهام ..
احنا عايشين يقين فى ربنا سبحانه وتعالى ..
يقين بيخلى كل أذى فى سبيله على قلبنا زى العسل ..
بس هو يرضى عننا ..

أكتر ناس عايشة فى الوهم اللى منتظرة السيسى يقوم بالبلد ! ..
بيدمروا دنيتهم بوقوفهم ورا واحد عسكرى فاشل ..
ويدمروا آخرتهم بمناصرتهم لمجرم قاتل وظالم ..

إنما احنا بفضل الله راضيين جدا بحياتنا ..
ومستمتعين بكل الأكشن اللى فيها ..
وعمرنا ماهنرجع بسبب أذى زاد أو نقص ..
ومحتسبين كل لحظة عند ربنا ..

انت بقى محتسب ضنك حياتك دا عند مين ؟! ..
عند السيسى ؟! ..
خليه ينفعك يوم القيامة ! ..

مش هتقدر أبدا تفهم يعنى إيه كل اللى بيجرالنا دا على قلبنا زى العسل إلا لما يكون عندك قلب الأول ! ..
قلب بيحرص على الشهادة فى سبيل الله أكثر من حرصه على الحياة الرخيصة اللى انت عايشها.