نافذة مصر
أشعل خطاب السيد الرئيس الدكتور محمد مرسي بالمحكمة صباح أمس الأحد مواقع التواصل الاجتماعي بتعليقات كثيرة بين مؤيد ومعارض إلا أن أغلبها قدم التحية للرئيس على شجاعته وثباته وصموده، وأثنى على مواقفه التي اتخذها إبان فترة حكمه.
وأوضحت التعليقات أن الرئيس فعل كل ما يستطيع من أجل انقاذ مصر من براثن عصابة الفساد في الجيش والشرطة وباقي المؤسسات لذلك لم يكن هناك بد من الانقلاب عليه من قبل قادة الفساد في تلك المؤسسات.
حيث علق الدكتور ياسر نجم على صفحته على موقع التواصل الاجتماعي "فيسبوك" قائلا:
تخيل لو كان مرسي صارح الشعب وهو في الحكم وعرفه بالآتي:
- ان قيادات الجيش متورطة في قتل المتظاهرين فى ثورة يناير..
- ان المخابرات تواطأت مع الجيش وأخفت الأدلة اللى تثبت تورطه..
- ان الداخلية هي اللي فتحت السجون..
- اننا هانحاكم كل المسئولين عن كشوف العذرية وعارفينهم بالإسم..
- ان الشرطة كانت بتنزل بلطجيتها يعتدوا على المعتصمين..
- ان أمن الدولة كان بيخطف المصابين من الثوار من المستشفيات..
- ان فيه مواطنين كتير الجيش خطفهم وخباهم ولحد دلوقتى مانعرفلهمش طريق..
- ان المواطنين الشرفاء اللى كانوا بيعتدوا على المتظاهرين دول مأجورين من الجيش..
- ان المدرعات بتاعة الجيش تواطأت مع المجرمين في موقعة الجمل..
_____________________________________________
مش بذمتك كان زمان الشعب وكمان الثوار وقفوا جنبه وحموه وكانت الثورة انتصرت...وماكناش بقينا في المصيبة اللي احنا فيها دلوقتى...؟؟؟!!!
_____________________________________________
طب ايه رأيك يا حيلتها ياللى عايش في مية البطيخ ان الكلام ده كله أعلن ونشر في جميع وسائل الإعلام الرسمية بالنص والحرف زى ما هو مكتوب فوق كده...واتنشر ان دى نتايج تقرير لجنة تقصي الحقائق اللى شكلها مرسي..واتنشر ان النيابة العامة هاتحقق في الجرايم دى وهاتتم محاكمات بناءا على النتايج دي... ومرسي كان عامل حساب ده من قبلها ومأسس حاجه اسمها (نيابة الثورة) تتخصص فقط في الجرايم دى (ثوار الغبرة نزلوا ضدها في هوجة الإعلان الدستوري وتم الغاءها بعد الإنقلاب اللى حصل على أكتافهم)...
ها ؟
حصل ايه لما اتنشر الكلام ده ؟
حصلت مذبحة سجن بورسعيد...
حصل حظر التجول اياه بتاع مدن القناة والشعب نزل يتحداه بماتشات الكورة..
حصل حدف الإتحادية بالمولوتوف..
حصل رفض الثوار اياهم الحوار مع مرسي رغم محاولاته العديدة..
حصل هجوم بشع على الفضائيات ضد مرسي..
حصل حصار لمكتب النائب العام اللي المفروض يحقق في الكلام ده ومابقاش عارف يدخل الحمام..
حصل اتحاد من القضاة اللى المفروض هايحكموا بناءا على النتايج دى لإسقاط مرسي..
حصل ان الثوار اياهم نزلوا يهتفوا ضد أخونة الدولة وحكم المرشد..
حصل الهجوم على مقرات الإخوان وحرقها وقتل من فيها...
حصلت تمرد....
حصل انقلاب...
_____________________________
ادي الشعب اللى وقف جنب مرسي لما عرف الحقايق دي..
بس سيبك انت..أهم حاجه ان مرسي قال: عندنا رجالة زى الدهب..
وأضاف في تدوينة أخرى :
معلومة لطيفة برضه للإفادة..تقرير تقصي الحقائق اللى مرسي اتكلم عليه ده وحوله للنائب العام مابيدينش السيسي بس بقتل المتظاهرين في التحرير..بيدين اعضاء المجلس العسكري بالكامل...والمخابرات العامة بالكامل..والمخابرات الحربية بالكامل..والشرطة بالكامل..في كل وقائع الثورة مش بس ميدان التحرير..
- تذكرة (1)..النائب العام اللي اتحول له التقرير اللي بيدين كل دول قضى الكام شهر اللى فضل فيهم في المنصب ومكتبه متحاصر..ومابيعرفش يدخل الحمام حتى..والمدانين فى التقرير ده هم اللى كانوا ورا الحصار...
- تذكرة (2) .التقرير ده اتقدم لمرسي بعد كام أسبوع من (علقة الإعلان الدستوري) ودستور 2012..والفضائيات كانت لسه مولعة عن الرئيس الديكتاتور وحكم المرشد اللي عايز يهدم مؤسسات الدولة المصرية..والمولوتوف كان لسه بيتحدف على الإتحادية وقت تقديم التقرير...
- تذكرة (3)..في الوقت اللى التقرير ده اتقدم لمرسي (يناير 2013) كان الإستعداد على قدم وساق للعصيان المدني ضد مرسي...وحكم مجزرة ستاد بورسعيد في نفس الشهر..واللى أسفر عن أحداث السجن وحظر التجول في مدن القناة..(واللي الجيش كان المفروض بينفذه)...
- تذكرة (4)...منذ فبراير 2013..والأصوات تتعالى تنادي الجيش و(السيسي) لإنقاذ البلد من حكم الإخوان..وأعقبها في ابريل لقاء السيسي الشهير بالفنانين والإعلاميين..واللي طالبوه فيه بده صراحة..وقال لهم: اصبروا اصبروا...كل شىء بأوان..
ومن ساعتها..بدأت حركة تمرد..والتحضير من جانب كل الأجهزة السيادية ل30 يونيو وسط دعاية إعلامية غير مسبوقة...
- مرسي حاول يجس نبض باقى اعضاء المجلس العسكرى أن يخلف أحدهم السيسي..فمالقاش منهم غير كل تضامن مع السيسي...
وزى ما مرسي قال: رجالة من دهب..
السيسي قال: لو الجيش عمل انقلاب..البلد دى هاتتخلف 30-40 سنة لورا..
ولا ده كان قصده انهم رجالة من دهب..ولا التاني كان قصده انه مش هايعمل انقلاب..كل واحد فاهم التاني...لكن واحد كان معاه أسلحة الدولة كلها...والتاني مامعوش...
___________________________
ده بس علشان الناس اللى بترغي وتقول: ازاى يكتفى بتحويل التقرير للنائب العام ومايشيلش السيسي ؟؟؟!! ازاى فضل ساكت 6 شهور ؟؟!!
ويطلع واحد من تحت البطانية يقول لك: مرسي خاين وعامل صفقة مع العسكر..
الكلام على قهاوي الفيس بوك سهل...
فيما علق الناشط زياد التابعي قائلا:
(واحد )
الحل رقم 1
إنتظار إثبات نيابة الثورة ماورد في التقرير ... فعل يليق بدولة مؤسسات و نخب وطنية وشعب واعى ...
لقد كنت سيادة الرئيس في مكانك ولكن في غير زمانك ...
الحل رقم 2
عزل المجلس العسكرى وتقديمه للمحاكمة ... محور الشر ( الثورنجية - الأعلام - الأحزاب - الجهلاء ) تظاهرات ضد أخونة الجيش ... الجيش ينحاز للشعب ... إنقلاب عسكرى
ومحور الشر يتكلم عن مرسى المندفع الغير سياسي ، وليته إنتظر تحقيقات النيابة فينقذ البلد من إنقلاب هو المتسبب فيه أو صارح الشعب بالحقيقة .
الحل رقم 3
الأستجابة لدعوات محور الشر بالدعوة لانتخابات رئاسية مبكرة
محور الشر ؛ سقف الطلبات إرتفع الان ليس أمامه سوى الأستقاله
الحل رقم 4
إستقالة الرئيس
محور الشر ؛ تخلى الرئيس عن ناخبيه وباع القضية ولم يستطع مواجهة التحديات ... ثم إجراء انتخابات ... والنتيجة طرطور يجلس على الكرسى وعسكر يحكم وشعب يصفق .
الحل رقم 5
القيام بعملية إغتيالات واسعه تستهدف جميع المجرمين ...
محور الشر : الفوضى تعم البلاد وعلى القوات المسلحة حفظ البلاد وتحركات دولية لفرض الأمن
.................................
ياسااااااااااااااااااااااااادة
الأنقلاب حدث منذ هتفنا مستقبلين الجيش في الشوارع ( الجيش والشعب إيد واحدة )
والرئيس كان يعمل وسط إنقلاب قائم فعلا ... حاول احتوائه والبحث عن شرفاء بينهم ، كما حاول اعادة لحمة الشارع لمواجهته من خلال دعوات مستميته للحوار الوطني ولكن الكل باع وخان frown رمز تعبيري
اااااااااه لو لم يغدر الثورنجية والنشطاء وبقى التلاحم على الأرض .
فيما قال الناشط أسامة عمران:
واحد من غير مخ: لا للإعلان الدستوري الذي يكرس لدكتاتورية مرسي والإخوان ويحصن قرارات الرئيس من المحكمة الدستورية التي عينها مبارك
واحد بدقن: الدولة الفاسدة اللي بناها مبارك بتعبه ٣٠ سنة بتتأخون
واحد بشعر: سنحاصر الإتحادية لمنع إقالة النائب العام الذي دفن قضايا الثوار لأن مرسي جايب نائب ملاكي
واحد من غير دم: كنا نعلم ولكن سنشارك الفلول لإسقاط مرسي
بعد شوية
كلهم في نفس واحد: يسقط مرسي الذي لم يحارب الدولة العميقة .. كان يصارحنا .. كنا وقفنا جنبه
كل دول ما يزعلونيش لأني عارف تصنيفهم من زمان ... اللي يزعلني ان واحد أو احدة ليهم عقل وعندهم عينين وليهم قلب حي ...سواء بشعر او من غير شعر .. .سواء بدقن او من غير دقن ... يصدقوا او يتهزوا من كلام شوية .... لا مؤاخذة.
وعلى نفس هذا المنوال جاءت تعليقات الكثير من رواد مواقع التواصل الاجتماعي.
وقالت الناشطة المصرية المقيمة بفرنسا "ولاء يوسف" :
ـ #مرسى كان عارف ان السيسي قاتل وعينه !!
ـ آه كان عارف مش مغيب ولا فاشل زى ما انت كنت بتتهمه .. بس هى السياسة كدا والله باكيدج على بعضه .. يا ترفضه كله و تطلع بره اللعبة .. يا ترضى بيه وتحاول تصلحه على قدر جهدك و االامكانيات المتاحة امامك ( الصندوق الاسود للعسكر )
ـ بس كان يقدر يطلع علينا ويفتح الصندوق واحنا كنا هنساعده!!
ـ آه زى ما طلع عليك بالاعلان الدستورى كدا و هاجت الدنيا عليه بفوبيا أخونة مفاصل وركب واوراك الدولة والنائب العام الملاكى .. و فى الاخر العسكر اجبره يلتزم بالباكيدج وانت معملتش حاجة برضو
ـ يبقى هو ضعيف وحسبى الله ونعم الوكيل .. كان سابها لحد قوى !!
ـ زى شفيق مثلا ؟! اهو عندك #تونس يا فتك اللى انت بتتحاكى بيها .. سلمت الباكيدج لنظام بن على برضو بعد ما قالوا زيك ان الاخوان ضعاف
ولا يمكن قصدك ابو إسماعيل ؟! مهو استسلم برضو مقدرش يقف قدامهم فى موضوع جنسية والدته !!
ـ اهو التبرير دا هو اللى جابنا ورا
ـ عايز الحق وماتزعلش ؟ اللى جابنا ورا هو التنظير على النت .. كله قاعد فى المدرجات عامل فيها ابوتريكة ولما نزل الملعب معرفش يلعب .. بقالك سنتين عارف ان السيسى قاتل و رغم كدا بقا رئيس جمهورية .. عارف انه ابن كلب يهودى وبيعادى دينك وانت كبيرك معاه تشتمه فى بوست على النت .. بصراحة انت #حنك ولازم تشت اب يور ماوس
ـ ماا هى سلمية الاخوان هى السبب !!!!!
ـ الاخوان ماعندهمش سلاح .. ولو عندهم مش هايشلوه ، انت عاجبك اهلا وسهلا وادينا معاهم لحد ما يقضى ربك أمرا كان مفعولا .. مش عجباك السلمية ، انزل اشترى سلاح وابدأ بنفسك او لو معاك رقم #البغدادى ابعتله رسالة SOS باتنين جينى
#كفايه_تنظير
#انزل_الملعب
لم يكن فى الامكان افضل مما كان .. ورينا انت بقا شطارتك بس مش على النت
وقال الناشط محمد عبدالخالق
طيب هو ليه مثلا الدكتور مرسى مشالش السيسى زى ما شال طنطاوى وجاب صدقى صبحى ولما يكتشف انه من العصابه يشيله ويجيب حجازى ولما يعرف انه ابن *** يشيله ويجيب وصفى ولما يظهر انه *** يشيله ويجيب واحد تانى ونفضل كده ندور على واحد عدل وسط عصابه متغلغل فيها الفساد من عشرات السنين لحد ما نجيب ملازم اول يبقى وزير دفاع.
وبعدين هو اى رئيس منتخب فى اى دوله بياخد صلاحياته منين هتقولى من الدستور و القانون طيب اذا كان تنفيذ القانون فى ايد الداخليه والقضاء والاتنين اوسخ من بعض واذا كانت القوة الى هى الجيش الى المفروض ان الريس القائد الاعلى ليه هو فى الحقيقه عصابه واذا كان الاعلام فى ايد الفسده والاوساخ.
واذا كان الريس لما حاول يرجع السلطه التشريعيه وقفوا ضده وانت قاعد على الفيس، ولما حاول يعمل اعلان دستورى علشان يقدر يحارب بيه المؤسسات الى كلها ضده بقى ديكتاتور ومش ديمقراطى وانت قاعد على الفيس، ولما رفض الاذعان والرضوخ للمؤامره الى حيكت ضده اتسجن وبتحاكم وبتتلفقله قضايا وانت قاعد على الفيس.
اقولك حاجه انا مش عاوزك تقف معاه ولا عاوزك تبطل قعده على الفيس انا عاوزك بس لما تيجى تجدد رخصتك تشوف نفسك وانت بترشى و **** لكل الموظفين والضباط.. وتسال نفسك انت ليه مبتقفش كده زى الراجل وتزعق بعلو حسك وتقول ده حقى القانونى انى اجدد رخصه ومش هرشى ولا **** لحد لما تعمل كده ابقى ادخل واشتم فى الناس الى كانت عاوزة تعملك كرامه بس الكل كان ضده وانت ساعتها كنت قاعد على الفيس بعد كده ابقوا رشحوا نفسكوا للرئاسه يا عم الدكر انت وهو طالما القياده فيكوا بس ربنا هاديكوا
