كفر الشيخ - عبد العال الصعيدي:

قالت هويدا حسانين والدة الطالبة دارين مطاوع أن إبنتها تعرضت لانتهاكات شديدة هي وزميلاتها المعتقلات بسجن القناطر.

وكتبت عبر موقع التواصل الاجتماعي "فيسبوك" عن الزيارة الأخيرة لأبنتها قائلة:

"حسبنا الله ونعم الوكيل ..لقد زرت بنتى اليوم الخميس ...لا اعرف من اين ابدا ...ولا اوصف ما هى فيه من تعب نفسى وجسدى ...

دخلت عند لقائها وجدتها تبكى وساعة ما شافتنى انهارت من البكاء اخذتها فى حضنى .. وهدأتها وقولت لها اهدى واحكى لى .....وطبعا البنات فى الزياره كلهم منهارين عند لقاء اهاليهم حولى ...

وبدات تحكى.. قالت الدكتوره سماح فى عنبر العسكرى جنبنا .. فى الساعه 11 يوم الثلاث مساء طلبت تشترى حاجه للاكل من الكافتريا ... والسجانه رفضت خروجها وحصلت بينهم مشاده علشان مفيش اكل ...وصلت لضرب الدكتوره سماح والبنات الى معاها صرخوا ...

شويه وجت لهم نفس السجانه بس معاها الجنائيات ونزلوا ضرب فى البنات .. ده كله فى عنبر العسكرى جنب دارين ...

عنبر دارين سمع صويت وفى بنت تبع السجن قالت لهم البنات بتنضرب فانهاروا وخافوا وقالوا الله اكبر ...بصوا لقوا الجنائيات جم عليهم لضربهم بالحديد والطوب..وبصراحه سوهم ضرب ..وراحوا قالوا لادارة السجن السياسين ضربونا ..

البنات عند دارين لقوا كم ظباط داخلين عليهم .. البنات خافوا منهم وذنبوهم على الحيط وفتشوهم وهم طالعين ..

سمعوا دارين وهى بتبكى بتقول متخفوش ربنا اقوى منهم ..قالها الظابط طيب هعلمكوا الادب الصبح .

يوم الاربع الساعه 11 صباحا لقوا الظباط دخلوا عليهم وكانوا رحلوا 8 من عنبر العسكرى والظابط وقفهم ..ومسك دارين من شعرها وهبدها فى الحيط مرتين ..وضربها بونيه فى ظهرها ... ووزعهم على العنابر بتاعت الجنائين ... بشعرهم ومن غير شبشب وبلبس النوم .. .

وقام مودى دارين عند الحمامات فى طرقه صغيره ..ولايوجد معها اى شىء ..وجلست من تعبها على الارض وكلها صراصير وقطط ...وباتت ليله من الخوف والبكاء ..

ربنا يجعلها لعنة عليهم .وطبعا عنيها مورمه وطلعالى محطمه نفسيا وتقولى اول مره اشوف القسوه دى فى حياتى ...

ولما جه معاد الزياره لقت السجانه بتقول لها لكى زياره دارين قالت لها مش طالعه بشعرى ... قالت لها امال كنتوا بتروحوا رابعة ازاى ...ردت دارين عليها وقالت لها بقولك مش طالعه بشعرى .. قامت بنت ناولت لدارين طرحه وشبشب وطلعت لي..

اول مره فى حياتى اشوف نظرة الحزن بالشكل ده فى عين بنتى ...قالتلى ادعيلى يا امى اطلع من هنا ....

وهما ربع ساعة زيارة بعد ما كان ساعه قبل كده ..ورجعت مصدومة من الحاصل ...حسبنا الله ونعم الوكيل"