نافذة مصر
ـ اتفضلوا الغدا يا بهوات
الغدا متنوع ، يعني أراضي وفلل وبط وحمام ورومي
وبترول وعيال وشباب وستات وفلوس ومرقة وغاز
ومحشي وبيتزا وفطير وعزب وجناين ومصانع .. كله كله ...
ـ اتفضل يا ممدوح بيه الورك ده
ـ تسلم إيدك .. اتفضل الصدر ده
ـ تسلم لي .. خد العزبة دي ابلعها
ـ لا والله ما حد واكلها غيرك.. أنا لسه واكل بير وخليج من شوية
ـ وأنا لسه واكل ألفين فدان خلاص مش قادر
ـ طب عشان خاطري جرَّب الشركة دي طعمها يجنن
ـ إيه يا فوزية مابتاكليش ليه؟
ـ خلاص يا نبيل أنا بقيت ع الآخر .. ع الآخر ..
أكلت طريق 200 كيلو
ـ طب جربي مصانع الأسمنت دي بالصلصة والمايونيز
ـ يووه إنت عارف إني با اضعف قدام أي حاجة حرشة ..
هات يا سيدي
ـ صفوت باشا .. سايب العيال دي لمين ..
ـ أكلت عشر كليات .. خلاص الحمد لله
ـ ياراجل وهوا فيه أطعم من العيال الصغيرين ..
دوق المدرستين دول
ـ يا رجالة .. يا ستات ..
ـ نعمين يا باشا
ـ عارفين الحلو إيه؟
ـ كل اللي ييجي من سعادتك حلو
ـ الحلو قناة السويس
ـ ها ها ها ها
ـ بس مسلوقة عشان الباشا الكبير ....
ـ ألف سلامة عليه .. ماله ؟
ـ حامل ...
ـ سايبين الكام قطر دولا لمين .. ما فيش حاجة تبات
كلوهم قبل ما يترموا في الزبالة
ـ فهمي بيه .. سايب العمولات دي لمين؟
ـ أصل أنا واكل عمولة القمح من 3 ساعات
ـ طب كمل جميلك وكل عمولة الدوا
ـ سفرا دايمة يا بيه ..
ـ هنيا يا بهوات
ـ فين آخر نكتة يا أنس بيه .. عايزين نهضم
ـ بيقول لك مرة واحد مات في طابور العيش عملوله جنازة بلدي
ـ ها ها ها ها هأ هااااااااااااااااااا يخرب عقلك دانت كارثة