نافذة مصر
ننشر تدوينة الناشط السيسي عمار ياسر والتي وصف فيها رعب الداخلية من الثوار بالعامية المصرية

وأنا راجع دلوقتي م المسيرة قولت أعدي على قسم "الرمل" أبص بصة هناك .. مش عارف ليه بس كان عندي فضول جامد أروح هناك , ومنها أغير الروتين وأروح من أبو قير بدل طريق البحر
المهم وصلت هناك وشوفت منظر من أحلى المناظر إللي شوفتها في حياتي يمكن ما شوفتش زيه من 25 يناير 2011
لقيت كم رهيب من أمناء الشرطة والعساكر والضباط واللواءات والبلطجية واقفين قدام القسم بعدد كبير وكلهم مسلحين ومستخبيين ورا الطوب والزلط وأشولة الرملة وماسكين الآلي والبنادق والقنابل والجرينوف وكم آسلحة رهيب ومتنوع !
 بس مش ده إللي لفت نظري إللي خلاني مبسوط والفرحة مش سايعاني .. كم الرعب إللي شوفته فيهم !! والخوف إللي راشق في عنيهم .. والهول إللي بيحوط حوليهم !!
مهمومين خايفين مترقبين .. موطيين راسهم يمكن بالعافية بتشوف وشوشهم  لدرجة إن محدش فيهم قادر يخطي خطوة في شارع أبو قير  عاملين بس فاتحة صغيرة حوالين الرمل تخش منها القسم لو عندك بلاغ ضد الإخوان أو كده
 على طول إفتكرت الآية 14 في سورة الحشر: "لَا يُقَاتِلُونَكُمْ جَمِيعًا إِلَّا فِي قُرًى مُحَصَّنَةٍ أَوْ مِنْ وَرَاءِ جُدُرٍ ۚ بَأْسُهُمْ بَيْنَهُمْ شَدِيدٌ ۚ تَحْسَبُهُمْ جَمِيعًا وَقُلُوبُهُمْ شَتَّىٰ ۚ ذَٰلِكَ بِأَنَّهُمْ قَوْمٌ لَا يَعْقِلُونَ"
 والله رغم إن قلبي يحترق آلما على الشهداء إلا أن هذا الموقف أسعدني كتير أوي .. حسيت بجد إن الدماء ما راحتش هدر  ومن إنهارده مش هتروح هدر  وإن لمجرد تصعيد خفيف - (بالألعاب النارية وشوية مسامير) - من أعداد بسيطة .. كانوا قربوا يعملوها على نفسهم .. وتقهقروا خلف حصونهم وأبراجهم  فمابلكم لما القلوب تقوى وتشتد والأعداد تزيد وتنهمر ؟!!
 لسه كل يوم من ده .. يا شوية سفاحين قتلة خلاص السلمية بتاعت (من ضربك على خدك الأيمن فأدر له خدك الأيسر) خلصت .. دلوقتي إللي هيفكر بس يضرب نار على مسيرة ولا مظاهرة بتقول كلمة حق في وجه سلطانٍ جائر .. لا يلومن إلا نفسه .. وكله بالحب والسلمية .. وإحنا بقى هنوريكم فعلاً (إن سلميتنا أقوى من الرصاص)
 إنما النصر صبر ساعة ! وقل عسى أن يقون قريبا !!