نافذة مصر
طيب خليني أقول اللي حصل عشان أنا مش ضامن أنا هصحي إمتي :
المكان : استقبال الجراحه مستشفي الدمرداش
الزمان : اليوم 27-7 من الساعه 7:48 دقيقه حتي الساعه الواحده ظهرا !!
من أول ما رجلي دخلت الإستقبال و الإستقبال كان حاله مقلوب ... في كل دقيقه عربية إسعاف أو اتنين كان بيوصلوا المستشفي و كل عربيه فيها اتنين أو تلاته مصابين , فضينا قسم التجميل عشان نقدر نستوعب الأعداد و بقي قسم التجميل بيستقبل الإصابات الخفيفه أو مش المميته و قسم الجراحه بيستقبل الإصابات الحرجه و العيادات قفلت و كل طاقه المستشفي بقت موجهه للإستقبال فقط
كل المصابين كانوا من المتظاهرين ... مفيش و لا مصاب كان من شرطه أو حيش " يبقي ازاي وزير الداخليه بيقول ان المتظاهرين هم اللي ضربوا رصاص "
حوالي الساعه 8:30 مستشفي التأمين الصحي أعلنت عدم قدرتها علي إستقبال حالات أخري و إن كل الحالات هتتحول لمستشفي الدمرداش و دار الشفا و " سيد جلال "
بلا أدني مبالغه معظم الإصابات اللي شفتها بعيني كانت إصابات رصاص حي في الراس أو الرقبه أو القلب ... من كل 20 حاله كانت بتبقي حاله مثلا ضرب برصاص حي في الأطراف أو خرطوش !!
أنا شفت بعيني 6 حالات وفاه :(( منهم اتنين رصاص حي في الدماغ مكنش فيه أي محاوله لإنقاذهم و اتنين رصاص حي في الرقبه حاولنا مع كل حاله 45 دقيقه CPR و لكن للأسف ماتوا مننا و حالتين رصاص في القلب مباشره .. حاله منهم الرصاصه كانت موجوده في ال ventricle و دول للأسف فشلت كل المحاولات في إنقاذهم :(((
في حاله من ال 6 اللي ماتوا مكنش معاه لا محفظه و لا موبايل و لا معاه حد و مات قبل ما نعرف حتي إسمه :((

اتصلنا بزمايلنا في مستشفي رابعه الميداني و عرفنا ايه اللي ناقص ليهم و بعتناه مع دكتور و في بنت تطوعت إنها تشتري مستلزمات و توديهم بنفسها !!
علي الساعه 10 أو 11 عدد عربيات الإسعاف ابتدي يقل و كلمنا المستشفي الميداني في رابعه و قالوا ان الضرب وقف !!
اتصلت بزميل لينا " مصطفي جمال " و كان جاي في عربيه إسعاف مع جثه متوفي من رابعه و مدرعات الجيش كانت قاطعه كل الطرق و فضل وقت طويل عقبال ما عرف يوصل الدمرداش
رقم وزارة الصحه مسخره ... ازاي 20 واحد توفوا و في الدمرداش في 6 و في دار الشفا في 11 و الأرقام دي أنا متأكد منها .. يبقي اللي مات في رابعه 3 بس !! .. و مع الاتصال بزمايلنا في المستشفي الميداني في رابعه أكدوا لينا أن عدد الوفيات عندهم تجاوز حاجز ال 120 " الكلام ده كان من 3 ساعات "
نقطه إيجابيه أول ما وجهنا نداء إننا في حاجه إلي دم في بنك الدم في ناس كتير جم اتبرعوا و أنا ماشي كان في طابور علي بنك الدم للتبرع !!
د.الكفراوي وصل المستشفي حوالي الساعه 11 -11:30 و لحد ما مشينا كان موجود بيشوف الدنيا ماشيه أزاي و ايه اللي ناقص
اللي حصل مجزره بكل المقاييس أسوأ 100 مره من أحداث محمد محمود و العباسيه ... الجو ريحته كانت دم !!
دي شهادتي عن اليوم في مستشفي الدمرداش الجامعي ... و حسبي الله و نعم الوكيل :(((