نافذة مصر - الأسكندرية - حصرياً

رسالة من احد معتقلي كوم الدكة:

يوم الأربعاء ٤ يونيو تفاجئنا بترحيلة العقابية ، دخل علينا العساكر قعدنا نهتف "مش هنروح العقابية“ ، قعدوا يشتمونا وسلطوا علينا الجنائيين طلعوا علينا بالأزايز والعصيان ضربونا وعورونا كلنا والضباط سابتهم يضربونا ويعورونا ، كلنا اتصابنا عن نفسي اتصابت في ايدي ورجلي.
شوية ولقينا ناصر العبد ومدير الأمن وقوات خاصة اقتحموا المكان واخدوا ناس مننا كنت منهم ، فشخوهم ضرب دي كلمة قليلة ، انا عمري ما كنت اتخيل انضرب الضرب ده .. قوات كلها مسلحة ضربونا بالخشب وضهر الأسلحة .. ربطونا خلفي ونيمونا على بطننا .. كانوا بيضربوا بالبيادات على وشوشنا .. وقعدنا اكتر من ربع ساعة ضرب متواصل من القوات الخاصة .. جسمنا كله كان بيجيب دم .. كلنا عندنا كدمات. كنا حوالي ١٥ واحد دول اللي انضربوا .. اما الباقي كان قاعد فوق مانضربوش ، ناصر العبد مدير الأمن كان بيضربني بنفسه.

كانوا بينتقموا مننا بأبشع الصور .. منعوا عننا الزيارات .. نيمونا عالبلاط يومين ونص كاملين .. ناس كتير عضمها وجعها من النوم عالبلاط .. الجنائين سرقوا مننا كل حاجاتنا .. كل مخبر بيدخل بيضرب فينا ويهينا ومانعرفش نتكلم.

 اللي حصل معانا مهما هنحكي مش هنعرف نقول كل اللي حصل.

عملولنا قضية .. ولفقولنا التعدي عالضباط وبلاوي كتير .. مانعين عننا كل حاجة انا باكتب الكلام ده بالعافية وانا خايف حد يشوفني. حسبنا الله ونعم

الوكيل #أحرار_كوم_الدكة