بسم الله الرحمن الرحيم

هذه رساله من طالب معتقل فى سجن اول مدينة نصر يروى فيها ما حدث له داخل القسم هو واصدقائه من كلية اللغات والترجمه

(احنا كنا ماشيين فى الشارع فى اول مكرم فجه وقف قدامنا ميكروباص ونزل منه ناس كتير بلبس مدنى ومعاهم اسلحه وخدو مننا البطايق والموبايلات وركبونا الميكروباص طبعا مع السباب بالاب والام والضرب والاهانه وركبونا فوق بعض ومشيوا بينا وفى الطريق

كان طالب فى كلية هندسه اسمه احمد فكرى كان بيشاور لميكروباص العاشر فوقفوله وقالوله انت رايح فين فجرى فجريوا وراه وضربوا عليه نار واخدوه ركبوه المهم وصلنا القسم واحنا نازلين كان فى قوات خاصه قالو محدش يضرب طلعنا فوق فتشونا واخدوا الفلوس اللى معانا وقطعو الغانله الداخليه لكل واحد وغموا بيها عنيه

قبلها كانوا نزلونا تحت فى مكتب المأمور وكان فى تحت ظباط جيش وبعض الناس بس كان شكله رتب وبعد كدا جه واحد جسمه ضخم كدا وسالنا واحد واحد سأل الاول مصطفى وضربه وبعد كدا احمد فكرى وضربه ودخل على عبدالرحمن النبوى صراحة قسى عليه شويه لحد ماوقع عالارض

ودخل عليا وسالنى وضربنى وبعدين اسامه ماهر زود الضرب عليه شويه لحد ماخلاه يقول اننا اخدنا 50 جنيه علشان ننزل مظاهرات وبعد كدا دخلونا مكان بس معرفتوش لانهم كانوا مغمين عينيا فبقوله لو اسمحت عاوز ادخل الحمام قالى اسكت يابن ........... هو احنا فى حضانه قولتله هو اللى فى حضانه بس بيدخل الحمام انت مبتدخلش الحمام ؟

مردش قولت حسبنا الله ونعم الوكيل ادايق كده وزعقلى وضربنى وبعدين دخلنى الحمام وبعد كده جه امين شرطه اسمه عبدالباسط بس اعوذ بالله معندوش حاجه غير سب الدين ودخلونا اوضه كدا وفيها طرابيزه مرصوص عليها سكاكين ومطاوى وسنج وشومه ونضارة غطس وموبايلتنا وصورونا معاها وجابو ناس جديده واحنا واقفين وضوبوهم جامد وبهدلوهم بعد كدا نزلنا على الحجز المغرب

وطبعا شتايم وقلة ادب واللى شتمونا تحت اسمهم (رجب - عادل ) وفقتشونا واخذو الاحزمه وميداليات المفاتيح كمان وبعد كدا وزعونا كل اتنين فى حجز عبدالرحمن واسامه فى حجز 3 ( حجز الكفار ) بيسموه كدا فى القسم وانا وابراهيم فى حجز 4 واحمد ومصطفى فى حجز 5 دخلنا انا وابراهيم الحجز كان فيه ما يقارب 65 فرد فى اوضه وسعها 4فى 5 متر قاعدين كدا على بعض وفى واحد اسمه ( #نبطشى)

دا عباره عن مسجون قديم زى مسؤول الحجز وبتدفعله فلوس اول ما تدخل مكان نومه #حمسين_جنيه بس قولتله اخدوا فلوسى فوق قالى خلاص كل زياره تجيب 20 جنيه بعد شويه جه نادى علينا واحد من بره وخرجنا واتجمعنا احنا السته وحط الكلايشات فى ايدينا ووشنا للحيط وقالنا كل واحد يطلع 50 حنيه ياولاد............ فقولناله اخدوا فلوسنا فوق فكان فاضل مع عبدالرحمن 100 جنيه اخدها

وبعد كدا ضربنا وبعد كدا طلعنا لوكيل النيابه وكان جثته كبيره كدا وكانت نفس الاوضه اللى اتصورنا فيها وسالنى بدات احكيله اللى حصل والقى عليا رصة تهم مش فاكر غير جزء منها من كترها منها ( اخلال بالوحده الوطنيه - تعريض المواطنين للاذى - ايقاف كامل القانون - حيازة سلاح ابيض (مطواه قرن غزال) - انتماء لجماعه ارهابيه - تعكير الامن العام )

قولتله محصلش والمطوه دا انا مشوفتهاش غير الصبح هنا عالطرابيزه وصورونا والمحامى طلب احالة المطوه للطب الشرعى برفع بصمات ورجعت للحجز ودخلت وسألنى النبطشى واسمه فووولى على 20 جنيه بما انى كنت فى زياره قولتله مش ادانى قالى روح اقف عند الحمام طبعا ريحته وحشه جدا جدا مرمى فيه زباله وبيستعمله 65 واحد فاحد المساجين ادانى علبة سجاير وقالى اعطيها للفولى واديتهالى وقعدنى بعد كدا

نادو علينا تانى علشان نطلع المباحث فوق واخدونا واحد واحد وغموه جامد بداو بابراهيم مجدى ودخل قعد حوالى تلت ساعه وجه شكله مرهق جدا جدا وتعبان واللى مغميه قاله تعد ومتتكلمش مع حد خالص وضربه على رأسه وبعد كدا دخلت انا مغمى عنيا وكنت مرعوب بعد ماشوفت ابراهيم وحالته ودخلت واحد قالى اقعد على ركبك هما كانو تلاته ومعايا الامين وكانوا امن دوله قالى اسمك ؟ قولتله ............................... منين ؟............................. بتصلى فين ؟........................... بتحضر دروس لمين فى المسجد ؟

قولتله مش بحضر مفيش اصلا دروس فى المسجد بتقرأ ايه ؟

قولت بقرا بعض كتب الكليه وقولتله بعض اسم المواد ايه اللى جابك هنا ؟

جاى علشان اشتغل فى معرض الكتاب قالى بص يابنى انت بتصلى ميتفعش تصلى وتكدب وقام ضاربنى على دماغى وقالى كل اللى فات دا كدب وانت كان معاك مطوه جايبه ليه ؟

قولتله مكانش معايا قالى مصطفى كان بيقول انك كان معاك واصلا مكانش مصطفى لسه دخل لانى كنت التانى بس طبعا مرضيتش اقوله كدا علشان ميزودش فى الضرب وقولتله يقول براحته انا مكانش معايا بدا يضربنى بالرجل فى كل مكان فى جسمى ويقولى ريحنا يابن ................. انت كان معاك جبتها منين احنا مش عايزيم منك حاجه بس لو مقولتش جبتها منين مانتش خارج من هنا

وهتاخد 15 سنه قولتله ياباش انا معرفهاش اصلا يبقى هعرف ازاى بتجاب منين !

بص ياباشا قول عايزنى اقول ايه وانا هاقول قولى بتجاب منين وانا هاقول قالى بتنزل مظاهرات فى الجامعه ؟ قولتله لا طب تعرف اخوان فى الجماعه قولتله لا وفضل يضرب بالرجل واليد طول التحقيق لحد ما خلص وكنت منهك جدا جدا من كتر الضرب وبعد كده الايام فى الحجز عادى زى بعضها