نافذة مصر
آخرتها برضه يا أمور
تقعد و تلفق دستور
و عشان يعني بقى لك دور
ترضى تقدمه للطرطور

**********
و بتتنطط و بتستلطف
و بكل سخافه بتستظرف
فرحان علشان ناس بتخطف
حطوك ريس على كام مقطف

**********
لف و قول دستور بأزايز
عدل فيه بانجو و برايز
و مراد العسكر بقى جايز
و الخسران بقى هو الفايز

**********
مش هاتكلم في التفاصيل
و لا راح اجيب لك ألف دليل
لو شرعيه جابتكوا بديل
عمر ما كنا نقول دلاديل

**********
إيه هنقوله و هنعيد إيه
و انت مقدر طبعا ليه
حبة خونه عملوك بيه
و يا خيبة المكسوره عينيه

**********
عشت حياتك كده ع الكيف
تلمع في نظام شغله الزيف
و النصاب في ربيع و ف صيف
عمر خريفه ما يبقى شريف

**********
فرحان لما بقيت م الأورطه
و هتاخد حته من التورته
رجعتونا لنفس الورطه
و بتضحكوا ع الناس بالخارطه

**********
بكره يبان كل المستور
و الشعب يدوس المغرور
بكره الحق يقول للزور
عشتها ليه يا بعيد مخمور

**********
والحق أكيد لو مقهور
يفضل حق ف وشه النور
و الزور حتى ان صار دستور
مهما ان عاش راح يفضل زور