حلمك حلال
صوتك ما زال
بيزلزل الزلزال
صوت الرجال
قال الموات لجل الوطن أولى
بينى وبين فجر الوطن شرف المحاوله
للظلم جوله
ونور الحق ليه جوﻻت
حكايات كتير
وسؤال بيتردد على لسان السكات
مين إللى مات
رد الجبان معرفش
لكن الوطن عارف
وعيونه ما بترحمش
أيوه اﻷسامى كتير
لكن الوطن بيعد
دمك وطن يا ورد
يا حاضن تراب اﻷرض
لكن السؤال يا وطن لما يجد الجد
فيه رد وﻻ مفيش
على دم أخوك
فيه رد وﻻ مفيش
على إللى خانوك
نازل فى عشق الوطن
وﻻ إنتا متنازل
يلعن أبو الخوف
إللى صنع المهازل
لو كنت فى ضهر أخوك
مكنش الجبان
حس بأمان وهو شايل مسدس
كان حس من وقفتك
إن الحياه شئ مقدس
لو كنت فى ضهر أخوك
مكنش الجبان
عمره إستهان بعيال أخوك اليتامى
ومرات أخوك إللى ﻻبسه إسود على نخوتك
يا إللى الرصاص سكتك
أصرخ فى وش الرصاصة
وريها إمتى تكون الكلمة قناصة
خوفها من غضبتك
علشان تحرم تقرب م إللى بتحبهم
دمك رخيص عندهم
إرفع فاتوره الدم
خلى الجميع يهتم
خلى الكلاب تتلم
قول للى قرر
يموت أخوك بكلمه ف ثانيه
إن إنتا لو مات أخوك هتكسر الدنيا
قول للى زعلان عشان بتعطل المترو
إن إنتا لو مات أخوك
هتخلع القضبان
وتوقف اﻷزمان
وهتقلب اﻷكوان
أنا دم أخويا حرام
مش لعبه راح تلعبوها
دنيتكوا يلعن أبوها
أنا دمى مالى الكون
يا صحاب ضمير ملعون
أنا الجنون إللى هيخليكوا راح تحسبوها
يا نشوه المغرور
يا قوه الرشاش
الحر عاش والندل مات م الخوف
إضرب ونشن كويس
أنا رصاصى الحروف
هتشوف رصاص الحرف لما يصيب
ويموت اﻷندال
أنا اللى حلمى حلال
وصوتى ما زال
بيزلزل الزلزال