رسالة من  خالد عسكر المحال أوراقه للمفتي في قضية قتل الحارس إلى أخته:

بسم الله الرحمن الرحيم
الى حبيبة قلبي الرقيقة /منى
السلام عليكم و رحمة الله و بركاته
طبعا مش عارف أقولك وحشتيني علشان الكلمة معدتش تكفي و معدش في كلام يكفي ....عسى الله أن يهون على قلبي واشوفكم و أخذكم في حضني لتطمئن نفسي ويهدأ قلبي و اشوف ابتسامتكم و اسمع كلامكم ....عسى ان يكون قريبا

خلينا بقى من الكلام بتاع الحب و الشوق ده و ارخم عليكم و أطمئنكم على نفسي انا و الحمد لله كويس جدا و في حالة رضا و ثبات و ده طبعا كرم من عند ربنا ......
جالي الخبر و انا كنت بغسل الهدوم تخيلي عملت ايه بقه !!! .....
ولا حاجة رحت نشرت الهدوم و رجعت قعدنا نضحك و الموضوع بالنسبة لنا ولا شئ لأننا واثقين ان ماعند الله خير و أبقى و حقيقي شفنا قيمة الدنيا هنا و حقيقتها و لقينا ان المكان هنا دار ممر و ليست دار مستقر فعلام الحزن ان كنّا مفارقين ان عاجلا او اجلا و لن يصيبنا الا ما كتب الله لنا فأياً كان الحكم فالرد واحد و ثابت الحمد لله على قدر الله و لن يصيبنا الا ما كتب الله لنا
لا أبالي حين اقتل مسلما على اي جنب كان في الله مصرعي.

المهم انا مش عايز اشوف اللي حصل المره اللي فاتت في اي مرة جاية
بتكلم عن العياط و الحزن و الضيق و الحاجات ديه .....
صحيح احنا بشر بس انا نفسي ربنا ينظر الى العائلة بتاعتنا على ما فيها من ابتلاءات فلا يجد في قلوبنا الا الصبر و الثبات و الرضا و القناعة بما عند الله فينظر إلينا نظرة رحمة و يرفع عنا البلاء و يدخلنا الجنة معاً.

ننتقل من فقرة الوعظ و النصح الديني الى فقرة الطمأنينة على حالك و حال الأحباب ..... اخباركوا ايه يا رب تكونوا بخير
حاولي ابعتيلي تطمنيني عليكي و على الدكتره و الولاد .... وحشوني كلهم و الله نفسي أخذ الولاد حضن كبييير افعصهم فيه و خاصة النونو الصغيرة ليان
سلميلي عليهم يا منى لحد لما اطلعلهم علشان اوريهم العين الحمرا هههه ؛
بس يا رب ميضربونيش و قوليلهم بلاش العض و الخربشة
سامحيني الفترة اللي فاتت قصرت شوية في حقك بس زي ما تقولي كنت محتاج فترة ارتب فيها دماغي و اقعد مع نفسي شوية صحيح متاخر بس انت عارفه ما بنذكرش الا في اخر لحظة .
خلينا نرجع للواقع شوية باقي عن الحكم حاجة بسيطة و عموما ممكن خلال الفترة القادمة يبقى صعب شوية التواصل و محدش يعرف الدنيا هتنتهي الى ايه علشان كده عايز منك حاجتين
• الاولى : تصبري و تصبّري ماما و تقفي جنبها و لمي اخواتي حواليها مش عايزها تقعد فاضية علشان متفكرش كتير
• الثانية: انك تعرفي انك كنتي أحب بنوته لقلبي كنتي اختي و بنتي عطيت كتير يوم فرحك على الرغم من حبي لدكتور / احمد و ثقتي فيه و كنت ساعتها صغير شوية ههههه .
صحيح قصرت معاكي زي ما قصرت مع كل الناس اللي بحبها.... مش عارف بقول الكلام ده ليه بس لو معرفتيش دلوقتي هتعرفي أمته ؟
و طبعا هبقى سعيد لو معاليكم افتكرتيني في دعائك و دعيتيلي ان ربنا يرضى عني و يرضيني
وسلامي لأعز الأحباب د/احمد و الأبناء العفاريت
محمد و سارة و ليان ... و متكتريش في السوشي ( ببين أني فاهم )

و حته من بتاعت السجون .... سلميلي على نفسك و خدي حضن للجميع و الى لقاء الله وحده يعلم متى سيكون و أين و لكن ظننا في الله خير و في كرمه و لطفه
السلام عليكم و رحمة الله و بركاته