رد الناشط والمدون "د. ياسر نجم" عبر حسابه على موقع "فيس بوك" على الهجوم الذي شنه الناشط المعارض للانقلاب ورجل الأعمال "د.أحمد غانم" على مؤيدي الرئيس مرسي، حين تذكروا مواقف الرئيس مرسي تجاه الشعب السوري، وتأكيد العديد منهم إنه لو كان مرسي في سدة الحكم ما فعل بشار ما يفعله الآن بحلب.

حيث قال غانم نصا:

"هو ايه علاقة مرسي بحلب؟ وايه البوستات الغريبة بتاعة لو كان مرسي موجود ماكانش ده حصل!! .. هوا مرسي عرف يحمي نفسه لما هيحمي السوريين؟! هوا مرسي عرف يحمي ثورة مصر لما هيحمي ثورة سوريا؟ بلاش خيبة بالله عليكم..وخلى الطابق مستور ‫#‏سراية_المجانين‬".

وهو مادفع نجم للرد قائلا :

بوست خيبان كالعادة ..مؤخراً....

١- هيكل صرح ان موقف مرسي من سورية من اهم أسباب الانقلاب عليه...
٢- بشار صرح ان الجيش والمخابرات كانوا بيتواصلوا معاه من ورا مرسي..
٣- بشار صرح ان السيسي بينسق معاه من ساعة الإنقلاب أمنيا وعسكريا على اعلى مستوى..
٤- بالقطع لو مصر وتركيا الاتنين ضد بشار كان الموقف هايفرق كتير عن الموقف الحالي اللي اردوغان فيه لوحده..
٥- مش بس كده..موقف ثلاثى بانضمام السعودية كان هايبقى أقوى بكتير..بدل سلمان ما فشل في تكوين حلف نتيجة توجه السيسي لمساندة بشار وسوء علاقاته مع تركيا..وغدره وخيانته..وابتزازه..
٦- علاقة السيسي بروسيا وبوتين مانعة مصر تاخد اي اجراء فعال ضد النظام السوري..
٧- المفروض انه كان دلوقتى هايبقى فيه برلمان منتخب حر هايساهم مع مرسي فى صناعة موقف مصر..
٨- المفروض اننا لو كنّا دولة مؤسسات ديموقراطية..المؤسسات دي تنصاع لمرسي والبرلمان..ايه وجه النباهه في انك تلوم رئيس معزول بانقلاب عسكري على انه خد موقف شريف من القضية قبل عزله وتدعى ان الانقلاب عليه واللى كان بسبب موقفه ده كان ضعف منه؟!!
٩- عندك رؤساء دول عربية..ومنهم اللي انقلب على مرسي محميين بجيوش ومخابرات وقوى دولية..ومع ذلك مش قادرين يقولوا: لبيكي يا سورية.. ولا يقطعوا العلاقات..ولا يتحدوا روسيا وإيران ولا حتى معنويا بكلمتين..ومع ذلك بتتهم مرسي بالضعف...
10- ماشفتش بوستات بتجزم ان مرسي كان قادر على حماية السوريين وحده..أو انه ماكانش ده هايحصل فى حكمه..
اللى شفته بوستات بتمتدح موقفه وقت ما كان فى الحكم مقارنة بمواقف الآخرين..
مش لازم الملح والفلفل يتضافوا علشان بوستاتك تبقى مبهرة..(بتشديد الباء من البهارات..مش من الإبهار)..
11- غريبة ان شخص ديموقراطي ليبرالي زيك مش فاهم أو عامل مش فاهم أهمية الدستور والبرلمان والديموقراطية اللى لو كانوا اكتملوا...حسب السكة اللى كان ماشي فيها مرسي كانوا كفيلين بحماية الاتنين..ثورة مصر وثورة سورية...
وبتبص للموضوع على انه مرسي كان المفروض يحمى الثورة ب"الفتونة" زيك زى اى شخص من اللى بنتريق على سطحيتهم وتناقضهم ليل نهار.