تقدمت أسرة الشاب كريم محمد راشد إسماعيل، 31 عامًا، من مدينة مطاى – قرية كوم والي بمحافظة المنيا، باستغاثة عاجلة بعد احتجازه بمركز شرطة مطاى منذ 13 يناير الماضي على ذمة قضية مخدرات وحيازة سلاح دون ترخيص، والتي تؤكد الأسرة أنها ملفقة نتيجة رفض كريم الانخراط في أعمال غير قانونية تحت ضغط ضباط المركز.

 

وفي استغاثتها المصورة، قالت الأم: “أنا أم مصرية، ست فلاحة من مطاى المنيا.. من يوم 13 يناير وإحنا عايشين في قهر وكسر قلب. ابني كريم مالوش ذنب غير إنه، خدته النخوة يدافع عن عمه في خناقة قديمة، واتحكم عليه بـ5 سنين.. وصبرنا وقلنا ضريبة إنه دافع عن عمه. ولما خرج، كان نفسه يعوضنا عن اللي فات، ويمشي دغري ويراعي شيبتي وشيبة أبوه الراجل العجوز”.

 

وتابعت الأم: “لكن ابني اتطلب منه يبيع ضميره ويشتغل مرشد.. ولما رفض وقال لا، عشان يفضل راجل وما يخونش الأمانة اللي ربيته عليها، انقلبت حياتنا جحيم، هددوه إنهم هيلبسوله قضايا، وفعلاً نفذوا تهديدهم ولفّقوا له قضية مخدرات وسلاح مالوش فيها يد، وخدوه من وسطنا ظلم، وفتشوا بيتنا 5 أدوار وما لقوش قشة تدينه.. ومع ذلك خدوه”.

 

وتؤكد الأم أن الأسرة تعرضت لانتهاكات مهينة داخل قسم الشرطة، قائلة: “إحنا أسرة كاملة اتهانت.. شوفنا اللي ما يتوصفش، بعد ما كريم اتاخد، استدرجوا بناتي الغلابة وأبوهم الراجل اللي عنده 70 سنة، وقال لهم ضابط من المركز: تعالوا كريم عايز يشوفكم، وبدل ما يحموهم، بناتي انضربوا قدام عين أبوهم اللي قعد يبكي زي الطفل وهو عاجز يحمي عرضه.. خرجوا مكسورين ومذلولين”.

 

وتضيف: “كل ده عشان ياخدوا تليفون ابني اللي عليه دليل براءته ويمسحوه، ووصل بيهم الأمر إنهم دخلوا له في الحبس الانفرادي، وضربوه ضرب مهين وتصرفات لا يرضاها دين ولا قانون، عشان يكسروا نفسه ويقول كلمة السر بتاعة تليفونه ويمسحوا التسجيلات اللي تثبت إنه بريء.”

 

وتواصل الأم استغاثتها: إحنا ابننا بتهان في القسم، وأنا وبناتي وجوزي بيتقال لنا: لو ما مسحتوش التسجيلات اللي معاكم، هنعمل فيكم زي ما عملنا في ابنكم، وهنكرر اللي حصل للبنات. ابني بيموت في الحبس من القهر والظلم.. بيدفع تمن كرامته وتمن إنه رفض يمشي في الحرام ويشتغل مرشد.”

 

وتؤكد الأسرة، من شهادات وفيديوهات وكاميرات مراقبة، أن القضية الموجهة لكريم “ملفقة بالكامل”، وأن ضباط مركز الشرطة استخدموا القوة والتهديد والتنكيل لأجل كسر إرادته، مما يشكل انتهاكًا صارخًا للحقوق الأساسية للأسرة.