شعر:د/ عادل فهمي
مين اللي قال : الشعب عايش ف الخيال؟
مين اللي قال: الثورة خلصت.. دول عيال..!!
مين اللي قال: اقضوا عليهم بالجمال
و الحكم يفضل بين خديجة وبين جمال..!!
جاوب يا مصري .قوم وشوف رمز الضلال ..!!
***
مين اللي عاوز يقضي ع الثورة الفتية؟
مين اللي عاوز يبتدي عهد الوسية ؟!
مين اللي عاوز إسرائيل تفضل قوية ؟!
مين اللي عايش للفلول والبلطجية؟!
جاوب يا مصري قبل ما يخلوك هفيّة..!!
***
مين اللي عاوز ينتقم من أهل مصر؟
مين اللي راجع مشتي إذلال وقهر ؟
مين اللي عايش بالفساد في كل عصر ؟
مين اللي خلى دمكم في الأرض نهر؟
جاوب يا مصري.. وكفايانا صبر ..!!
***
مين اللي عاوز مصر ترجع للفتن ؟
ونعيش مصايب يحترق فيها الوطن ..!!
يحرق كنايس.. والكنيسة تعيش محن..!!
مين اللي عاوز للمساجد تُمتهن؟
جاوب يا مصري قبل ما يفوت الزمن ؟
***
مين اللي قال أحمد شفيق هو البطل؟
أحمد شفيق.. ضالع ف موقعة الجمل ..!!
أحمد شفيق عند الصهاينة بيشتغل ..!!
أحمد شفيق شيخ الفلول المبتذل..!!
صحصح يا مصري.. قبل ما يموت الأمل ..!!
